(ସନେଟ୍)
ଜନ୍ମେ ଜନ୍ମେ କରି ଯାହା ଯେତେ ଅନ୍ବେଷଣ,
ତୃପ୍ତି ଖୋଜି ଏଣେ ତେଣେ ଧାଇଁଥିବି ଯାହା,
ପାଇଛି ଯା ଜନ୍ମେ ଜନ୍ମେ ତୋଷଣ, କଷଣ,
ହେ ନାଥ, ସେ ସବୁ ତତେ ଖୋଜିବାର ରାହା।
ଧନେ, ମନେ, ପଦେ, କାନ୍ତ କାମିନୀ ନୟନେ
ହେ ପ୍ରିୟ, ତୁମରେ ମାତ୍ର ଖୋଜିଛି ମୁଁ ଚିର,
ତୁମରେ ଚୁମ୍ବିଛି ନିକି ପ୍ରେୟସୀ-ଚୁମ୍ବକେ,
ତା’ ବିରହେ ତାମ ଲାଗି ଖସେ ଅଶ୍ରୁନୀର।
ରୁଦ୍ଧ ଜୀବ ନାନା ପଥେ ଖୋଜିଅଛି ବାଟ
କାହିଁ ସେ ପାଇବ ତାର ସୁଖ ଅପହୃତ,
ଖୋଲିବାକୁ ଆଘାତିଛି ଅଗଣ କବାଟ
କିଏ କାଳେ ଦେବ ସେହି ବିସ୍ମୃତ ଅମୃତ।
ନାନା-ଫୁଲ-ମାଳା ମୋର ଜନ୍ମଜନ୍ମାନ୍ତର
ଭେଟି ଶେଷେ ଦେଖିବାକୁ ଚରଣ ପ୍ରିୟର।
– 0 –
ଏହି କବିତାଟି ଲେଖକଙ୍କ ଦ୍ୱାରା ସମ୍ପାଦିତ ସାହିତ୍ୟ ପତ୍ରିକା ‘ଶଙ୍ଖ’, ପ୍ରଥମ ବର୍ଷ, ଅଷ୍ଟମ ସଂଖ୍ୟାରୁ ଆନୀତ।
