୰ ଅଭିମନ୍ୟୁ ସାମନ୍ତସିଂହାର

ବିଦଗ୍ଧ କବିଭାବେ ପରିଚିତ ଅଭିମନ୍ୟୁ ସାମନ୍ତସିଂହାର (୧୭୫୭-୧୮୦୬) ଜମିଦାର ପରିବାରରେ ଜନ୍ମ ହୋଇଥିଲେ ମଧ୍ୟ ଶ୍ରୀକୃଷ୍ଣ ଓ ରାଧାଙ୍କ ପ୍ରତି ପ୍ରେମ ଓ ଭକ୍ତିଭାବମୂଳକ କବିତା ଓ କାବ୍ୟ ରଚନା ନିମନ୍ତେ ପରିଚିତ। ତାଙ୍କ ରଚିତ ଓ ବହୁ ପଠିତ ତଥା ୯୬ ଛାନ୍ଦ ବିଶିଷ୍ଟ ତଥା ରାଧାକୃଷ୍ଣଙ୍କ ପ୍ରେମଲୀଳା ସମ୍ବଳିତ ଚାରୁକାବ୍ୟ ହେଉଛି ‘ବିଦଗ୍ଧ ଚିନ୍ତାମଣି’।

ଏହା ସହିତ ତାଙ୍କ ରଚିତ କାବ୍ୟ ମଧ୍ୟରେ ରହିଛି ‘ପ୍ରେମ ଚିନ୍ତାମଣି’, ‘ପ୍ରେମକଳା’, ‘ରସବତୀ’ ଓ ‘ସୁଲକ୍ଷଣା’ ଆଦି। ବିଶିଷ୍ଟ ବୈଷ୍ଣବ କବି ସଦାନନ୍ଦ କବିସୂର୍ଯ୍ୟ ବ୍ରହ୍ମାଙ୍କଠାରୁ ଦୀକ୍ଷା ଗ୍ରହଣ କରି କବି ଅଭିମନ୍ୟୁ ରାଧାକୃଷ୍ଣ ଲୀଳାତ୍ମକ କାବ୍ୟ କବିତା ରଚନା କରିଯାଇଛନ୍ତି। କାବ୍ୟଯୁଗର ପରମ୍ପରାରେ କବି ଅଭିମନ୍ୟୁ ବିଭିନ୍ନ ରସ ଓ ଅଳଙ୍କାର ଯୋଗ କରି ରଚନା କରିଥିବା କାବ୍ୟ ଓ କବିତାଗୁଡ଼ିକ ପାଠକମାନଙ୍କ ଦ୍ୱାରା ବେଶ୍‌ ଆଦୃତ ହୋଇଥିଲା।

ସ୍ୱର୍ଗତ ଅଭିମନ୍ୟୁ ମଞ୍ଜରୀ ଭାବର ଉପାସକ ହେବା ସହ କିଛି ମାତ୍ରାରେ ଉପେନ୍ଦ୍ର ଭଞ୍ଜଙ୍କ ରଚନା ଦ୍ୱାରା ପ୍ରଭାବିତ ହେବା ସହ ମହାଭାରତର କଥାବସ୍ତୁ ଆଧାରରେ ରଚନା କରିଛନ୍ତି ‘ସୁଲକ୍ଷଣା’।