ତରୁଣକାନ୍ତି ମିଶ୍ର

୧୯୫୦ ମସିହାରେ କେନ୍ଦୁଝରଠାରେ ଜନ୍ମ ଗ୍ରହଣ କରିଥିବା ।ତରୁଣକାନ୍ତି ମିଶ୍ର ଓଡ଼ିଆ କଥାସାହିତ୍ୟରେ ଜଣେ ପ୍ରମୁଖ ଗାଳ୍ପିକ ଭାବେ ପ୍ରସିଦ୍ଧ। ଅତ୍ୟନ୍ତ ସମ୍ବେଦନଶୀଳ ତାଙ୍କର ମଧୁର ସ୍ବାଦସିକ୍ତ ଗଳ୍ପଗୁଡ଼ିକ ପାଠକଙ୍କୁ ଅନେକ ଦିନ ଯାଏଁ ଘାରିରଖିବାକୁ ଯଥେଷ୍ଟ। ୧୪ଟି ଗଳ୍ପ ସଂକଳନ ଓ ଗୋଟିଏ ଉପନ୍ୟାସର ରଚୟିତା ଶ୍ରୀ ମିଶ୍ରଙ୍କର ଉଲ୍ଲେଖନୀୟ ରଚନାବଳୀ ମଧ୍ୟରେ ‘ଆବର୍ତ୍ତର ଦୁଇଟି ସ୍ବର’, ‘ନିସଙ୍ଗତାର ସ୍ବର’, ‘କୋମଳ ଗାନ୍ଧାର’, ‘ବହୁବ୍ରୀହି’, ‘ପାରାଡାଇଜ୍ ପକ୍ଷୀ ଓ ଜଣେ ନିରସ୍ତ୍ର ଆତତାୟୀ’, ‘ବୀତଂସ’, ‘ପ୍ରଜାପତିର ଡେଣା ନାହିଁ’, ‘ଆକାଶ ସେତୁ’, ‘ଲୁବ୍ଧକର ରାତି’ ଆଦି ଅନ୍ୟତମ।

ଉଲ୍ଲେଖନୀୟ ସାହିତ୍ୟ ସାଧନା ପାଇଁ ସେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର, ଶାରଳା ପୁରସ୍କାର ଭଳି ଅନେକ ମର୍ଯ୍ୟାଦାଜନକ ପୁରସ୍କାରରେ ସମ୍ବର୍ଦ୍ଧିତ। ତାଙ୍କର ଗଳ୍ପ ବିଭିନ୍ନ ଭାରତୀୟ ତଥା ବୈଦେଶିକ ଭାଷାରେ ଅନୁଦିତ ଏବଂ ଆଦୃତ। ସ୍ନାତକ ଉପାଧି ପୂର୍ବରୁ ପ୍ରଥମ ଗଳ୍ପ ସଂକଳନ ପ୍ରକାଶିତ ହେବାର ସୌଭାଗ୍ୟ ଅର୍ଜିଥିବା ଗାଳ୍ପିକ ଶ୍ରୀ ମିଶ୍ର ଓଡ଼ିଶା ଓ ଇଂଲଣ୍ଡରେ ଶିକ୍ଷା ଲାଭ ପରେ ୧୯୭୫ ମସିହାରେ ଭାରତୀୟ ପ୍ରଶାସନିକ ସେବାରେ ଯୋଗ ଦେଇଥିଲେ। ଓଡ଼ିଶା ରାଜ୍ୟ ସରକାରଙ୍କ ମୁଖ୍ୟ ସଚିବ ଭାବେ ସେ ଅବସରପ୍ରାପ୍ତ ଏବଂ ସଂପ୍ରତି ରାଜ୍ୟ ମୁଖ୍ୟ ସୂଚନା କମିଶନର ଭାବେ ଅବସ୍ଥାପିତ।