ମାଆ !
ତୁମେ ଆସିବ ବୋଲି
ମାଟି-ମଲାଟ ରେ
ବିଛେଇ ଯାଇଛି
ସବୁଜ ଘାସ-ଗାଲିଚା

ନଈ, ପୋଖରୀର କାଚକେନ୍ଦୁ ପାଣି
ଅନାଇ ରହିଛି-
ପଦ ଯୁଗଳ ଧୌତ ପାଇଁ..
ଚାମର କରୁଛି
ଶୁଭ୍ର କାଶତଣ୍ଡୀ ୤

ରଜତ ଜୋଛନା
ବିଞ୍ଚି ଦେଇଛି ଜହ୍ନ
ଧରା-ଅଗଣାରେ ୤
ଶେଫାଳି ଗୁନ୍ଥିଛି ହାର
ସାଜିବାକୁ କବରୀରେ ୤

ଘରେ ଘରେ,
ପୁରେ ପୁରେ,
ସରୁଚକୁଳି, ଛୁଞ୍ଚିପତରରୁ
ମଣ୍ଡାପିଠା ଯାଏ
ଚାଲିଛି ତିଆରି
ନୈବେଦ୍ୟ ପାଇଁ ପୂଜାରେ ୤

ନୀଳ ପଦ୍ମ ଢ଼ଳ ଢ଼ଳ,
ସ୍ବାଗତ ପାଇଁ
ପ୍ରଜାପତି, ଭ୍ରମର ମାଳ ମାଳ ୤
ଆସ ମା !
ବାଢ଼ିବାକୁ ଭକ୍ତି ନୈବେଦ୍ୟ
ସମସ୍ତେ ବ୍ୟାକୁଳ ୤