ଜୋଛନା ଗୋ ! ତୁମେ ଲୁଚନା,
ନୀଳ ଆକାଶର ନୀଳ ମେଘ ତଳେ ଲୁଚନା ୥

ଓହ୍ଲାଇ ଆସଗୋ ଏ ଉତ୍କଳ ଭୂମେ
ଝରାଇ ସୁଷମା ବନ୍ୟା,
ଉତ୍ତୁଙ୍ଗ ଶିଖରୀ ତୁମରି ପରଶେ
ହସିଉଠି ହେଉ ଧନ୍ୟା ୥

ଛୁଇଁ ଯାଉ ତୁମ କାଉଁରୀ ଝଲକ
କୁଞ୍ଜ କାନନ କନ୍ୟା,
ସଜାଇ ଦିଅଗୋ ତୁମରି ହସ୍ତେ
ରୂପସୀ ଉତ୍କଳ ମାନ୍ୟା ୥

ମରାଳମାଳିନୀ ଚିଲିକା ବୁକୁ ଗୋ
ଛାଡ଼ି ତୁମେ ଚାଲି ଯାଅନା,
ଖୁସି ହେଉଥାଉ ଓଡ଼ିଆ ପୁଅ ଗୋ
ହେଜି କବିର କଳ୍ପନା ୥

ନୀଳ ଚିକୁରା ମହାନଦୀ ଜଳେ
ଖେଳ ଖେଳୁଥାଅ ଜୋଛନା,
କବି ମାୟାଧର ଗାଥାର ଭୋଳେ
ମନଭରି ତୁମ କାମନା ୥

ବାଷ୍ପୀୟ ଶକଟ ଧାର ତୋ ପରଶେ
ହସାଅ ନ କରି ଛଳନା,
ଗବାକ୍ଷ ଫାଙ୍କରେ ଦେଖୁ ଓଡ଼ିଆ ଗୋ
ଉତ୍କଳ-ମଣିର ଚେତନା ୥