ଭୁବନେଶ୍ବର: ସମୟର ସ୍ବର ଶୁଣିବା ଓ ଚିହ୍ନିବା ଜଣେ ସାହିତ୍ୟ ପତ୍ରିକାର ସମ୍ପାଦକଙ୍କ ଦାୟିତ୍ବ୤ ବାସ୍ତବ କବିତା ବା ଗଳ୍ପ ସଂଗ୍ରହ କରିବା ଓ ଏହାର ପ୍ରଚାର ଓ ପ୍ରସାର ପ୍ରତି ପ୍ରାଥମିକତା ଦେବା ସେମାନଙ୍କ କର୍ତ୍ତବ୍ୟ ବୋଲି କହିଛନ୍ତି ବରିଷ୍ଠ ତଥା ବର୍ଷିୟାନ୍‌ ସାହିତ୍ୟିକ ମନୋଜ ଦାସ୤ ଓଡ଼ିଶା ସାହିତ୍ୟ ଏକାଡ଼େମୀ ପକ୍ଷରୁ ସ୍ଥାନୀୟ ଭଞ୍ଜକଳା ମଣ୍ଡପରେ ଅନୁଷ୍ଠିତ ଓଡ଼ିଆ ସାହିତ୍ୟ ପତ୍ରିକା ସମ୍ପାଦକ ସମ୍ମିଳନୀରେ ମୁଖ୍ୟ ଅତିଥି ଭାବେ ଯୋଗଦେଇ ଶ୍ରୀ ଦାସ ଏହା କହିଥିଲେ୤ ଏକାଡ଼େମୀର ସଭାପତି ସାତକଡ଼ି ହୋତାଙ୍କ ପୌରାହିତ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଯୋଗଦେଇ ଶ୍ରୀ ଦାସ ସାହିତ୍ୟ ପତ୍ରିକାର ସଂଖ୍ୟା ବୃଦ୍ଧି ପାଇଥିଲେ ମଧ୍ୟ ସେହି ତୁଳନାରେ ଦାୟିତ୍ବବାନ ସମ୍ପାଦକଙ୍କ ସଂଖ୍ୟା ବୃଦ୍ଧି ପାଇନାହିଁ ବୋଲି କହିଥିଲେ୤ ଏଥିରେ ସମ୍ମାନିତ ଅତିଥି ଭାବେ ‘ଝଙ୍କାର’ ପତ୍ରିକାର ସମ୍ପାଦକ ସରୋଜ ରଞ୍ଜନ ମହାନ୍ତି, ସମ୍ପାଦନା ହେଉଛି ଏକ କଳା ଏବଂ ଭାଷା ଓ ବ୍ୟାକରଣ ଜ୍ଞାନ ଉପରେ ସମ୍ପାଦକଙ୍କ ଦକ୍ଷତା ରହିବା ଜରୁରି ବୋଲି କହିଥିଲେ୤ ପ୍ରଥମ ଅଧିବେଶନ ଶେଷରେ ଓଡ଼ିଶା ସାହିତ୍ୟ ଏକାଡ଼େମୀର ଉପସଭାପତି ଗିରି ଦଣ୍ଡସେନା ଧନ୍ୟବାଦ ଅର୍ପଣ କରିଥିଲେ୤

କାର୍ଯ୍ୟକ୍ରମର ଦ୍ବିତୀୟ ଅଧିବେଶନରେ ‘ଓଡ଼ିଆ ପତ୍ରପତ୍ରିକାର ବିବର୍ତ୍ତନ ଓ ଇଣ୍ଟର୍‌ନେଟ୍‌ ଯୁଗରେ ଓଡ଼ିଆ ପତ୍ରପତ୍ରିକା: ସଙ୍କଟ ଓ ସମ୍ଭାବନା’ ସଂପର୍କରେ ଆଲୋଚନା ହୋଇଥିଲା୤ ଏଥିରେ ‘ପୌରୁଷ’ ପତ୍ରିକାର ସମ୍ପାଦକ ଅସିତ୍‌ ମହାନ୍ତି ପୌରହିତ୍ୟ କରି ଓଡ଼ିଆ ଖବରକାଗଜ ଓ ପତ୍ରପତ୍ରିକା ମଧ୍ୟରେ ଉତ୍ତମ ସମନ୍ବୟ ରହିବା ଆବଶ୍ୟକ ବୋଲି କହିଥିଲେ୤ ସମ୍ପ୍ରତି ଇଣ୍ଟରନେଟ୍‌ର ବହୁଳ ପ୍ରଚାର ଓ ପ୍ରସାର ଫଳରେ କେତେକ ଓଡ଼ିଆ ପତ୍ରିକା ଏହି ଦୌଡ଼ରେ ସାମିଲ୍‌ ହେବା ଓଡ଼ିଆ ଭାଷା ପାଇଁ ଭଲ ସୂଚନା ବୋଲି ସେ କହିଥିଲେ୤ ଏଥିରେ ମୁଖ୍ୟ ଅତିଥି ଭାବେ ପ୍ରତିଷ୍ଠିତ ସାହିତ୍ୟିକ ଡ. ଅର୍ଚ୍ଚନା ନାୟକ ଯୋଗଦେଇ ଓଡ଼ିଆ ପତ୍ରିକା ବିଶେଷ କରି ସାହିତ୍ୟ ପତ୍ରିକା କ୍ଷେତ୍ରରେ ଦେଖାଦେଇଥିବା ସଙ୍କଟ ବିଷୟରେ କହିଥିଲେ୤ ବିଶେଷ କରି ପାଠକମାନଙ୍କ ଆଗ୍ରହ ଓ ରୁଚିକୁ ଦୃଷ୍ଟିରେ ରଖି ପତ୍ରିକାର ବିଷୟ ଓ ଲେଖା ପ୍ରକାଶ କରାଯିବା ଉପରେ ଡ. ନାୟକ ଗୁରୁତ୍ବ ଦେଇଥିଲେ୤ ଏହି ଆଲୋଚନାରେ ରମାକାନ୍ତ ଜେନା, କେଦାର ମିଶ୍ର ଓ ଡ. ଫଣୀନ୍ଦ୍ର ଭୂଷଣ ନନ୍ଦ ପ୍ରମୁଖ ଭାଗ ନେଇଥିଲେ୤

ସେହିପରି ଅପରାହ୍ନରେ ଅନୁଷ୍ଠିତ ତୃତୀୟ ତଥା ଶେଷ ଅଧିବେଶନରେ ଅଧ୍ୟକ୍ଷତା କରିଥିଲେ ଡ.ଶକୁନ୍ତଳା ବଳିୟାରସିଂହ୤ ମୁଖ୍ୟଅତିଥି ଭାବେ ଡ. ନବକିଶୋର ମିଶ୍ର ଯୋଗ ଦେଇଥିବାବେଳେ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ ସୁଶାନ୍ତ କୁମାର ନାୟକ୤ ଏହି ଅବସରରେ ପବିତ୍ର ପାଣିଗ୍ରାହୀଙ୍କ ‘ଐତିହାସିକ ମନ୍ମଥନାଥ ଦାସ’ ଗିରିଜା ପ୍ରସାଦ ବସୁଙ୍କ ‘କବିମଞ୍ଜୁଳ କୃଷ୍ଣପ୍ରସାଦ ବସୁ’ ସୁସ୍ମିତା ରଥଙ୍କ ‘କବି ଭାନୁଜୀ ରାଓ’ ଓ ସୁପ୍ରଭା ରାୟଙ୍କ ଦ୍ବାରା ଓଡ଼ିଆରେ ଅନୁବାଦ ହୋଇଥିବା ଆଶାପୂର୍ଣ୍ଣ ଦେବୀଙ୍କ ମୂଳ ବଙ୍ଗଳା ଉପନ୍ୟାସ ‘ଶବ ସାଧକ’ ପୁସ୍ତକ ଉନ୍ମୋଚିତ ହୋଇଥିଲା୤ ଏହି କାର୍ଯ୍ୟକ୍ରମରେ ବିଭିନ୍ନ ପତ୍ରପତ୍ରିକା ସମ୍ପାଦକ ଏବଂ ସାହିତ୍ୟିକମାନେ ଉପସ୍ଥିତ ଥିଲେ୤