କାଲି ରାତି ଅଂଧାରରେ
ମୁଁ ତୁମ ଉପରେ
ସଂତର୍ପଣରେ ହାତ ରଖିଲି
କାଳେ ଚମକିପଡି
ତୁମ ନିଦ ଭାଂଗିଯିବ ବୋଲି୤
ତୁମେ କିନ୍ତୁ ନିଘୋଡ ନିଦରେ
ଅଚେତ ଥିଲ
ଦିନଯାକର ଖେଳକୁଦ ପରେ
କ୍ଲାଂତ ଶିଶୁଟିଏ ପରି୤

ତୁମ ଶ୍ବାସ ପ୍ରଶ୍ବାସର
ଗଳିକଂଦିରେ
ତୁମ ସ୍ପଂଦନର ଗିରି କାଂତାରରେ
ମୁଁ ବୋଧହୁଏ ଖୋଜିଲି
ତୁମ ଆତ୍ମାକୁ୤
ଜାଣେ, କାଲି ସକାଳକୁ
କାହାରି ହେଲେ
ମନେ ନ ଥିବ
ଯେ ଆମେ କାଲି ପୂରା ଦିନଟା
ସାଂଗ ହୋଇ ବିତାଇଥିଲେ,
ଘର ସଜାଡି, ପରସ୍ପରର
ଝାଳ ପୋଛି, ଗୀତ ବୋଲି
ହସି କାଂଦି ଗପି ଖେଳି

ପୃଥିବୀର
କାହାରି ମନେ ନ ଥିବ
ଯେ ଆମେ କାଲି
ଏଇ ଘରେ
ସାଂଗ ହୋଇ ଥିଲେ !

ଏପରିକି ତୁମର ବି ମନେ ନ ଥିବ
ଯେ ତୁମ ପାଖରେ ସାରାରାତି
କାଲି ମୁଁ ଶୋଇଥିଲି

ଓ ତୁମ ଆତ୍ମାକୁ
କେତେଥର ଛୁଇଁଥିଲି୤

●